Eventos

cultura

Festas populares e culturais

Alfaroleiros

Mostra de olería popular que se celebra a principios de agosto no parque Luís Seoane de Santa Cruz, na que participan artesáns de toda España. Artesanía, tradición e natureza mestúranse para ofrecer ás persoas visitantes parte do patrimonio herdado dos nosos devanceiros.

Paralelamente á feira celébranse diferentes actividades culturais como concertos, obradoiros de barro, etc. O visitante poderá completar o seu paso pola feira coa visita ao Museo Os Oleiros.

Entroido

Celébrase nas diversas parroquias, destacando especialmente a festa organizada en Oleiros "O entroido dos vellos", dedicada aos nosos maiores. Nel lévanse a cabo representacións parateatrais, concursos de disfraces, de baile e orquestras, acompañados de doces e de sobremesas típicas do momento: filloas, orellas…

deporte

Eventos deportivos

Tríatlon

Proba consistente en carreira, ciclismo e natación que ten lugar cada primavera en Mera. As probas realízanse no paseo marítimo e o contorno do parque da Lagoa, nela participan tanto veciños como deportistas federados de toda Galicia.

Bandeira de Traíñas

Competición galega de traiñeiras que se celebra cada verán na praia de Santa Cristina.

Travesía Costa Oleiros

Proba de natación que ten como punto de chegada a praia de Santa Cristina. A competición consta de tres distancias a cubrir de 6000, 3000 e 2000 metros con saídas desde as praias de Mera, Santa Cruz e Bastiagueiro. A proba celébrase no mes de xullo.