Símbolo do concello

Castelo de Santa Cruz

O Castelo de Santa Cruz é un dos símbolos do concello de Oleiros, tanto pola súa gran beleza natural e paisaxística como polo seu alto interese histórico.

Foi mandado construír no século XVI para reforzar o sistema defensivo da cidade, tras o ataque da Armada Inglesa comandada por Sir Francis Drake ao porto da Coruña.

Co paso do tempo perdeu o seu valor estratéxico e no século XIX pasou a ser propiedade da familia da escritora Emilia Pardo Bazán. Máis adiante, o Castelo converteuse en residencia de verán de orfos de militares. Actualmente na planta baixa atópanse dúas Salas de Exposicións Municipais que acollen as mostras: “EnsambleIsaac” e “Obxectomanía: Unha historia singular do coleccionismo”. Na primeira planta está a sede do CEIDA (Centro de Extensión Universitaria e Divulgación Ambiental de Galicia), referente a nivel autonómico, adicado a promover a educación ambiental en todos os sectores sociais, así como o intercambio científico e cultural, traballando na procura de solucións aos problemas ambientais e fomentando as boas prácticas neste eido.

O Castelo está enclavado nun illote unido ao porto de Santa Cruz por unha pasarela peonil. Rodeando a illa, un paseo litoral permítenos gozar dunhas estupendas vistas da cidade da Coruña.

Máis sobre CEIDA

Normas acceso